March 19, 2013

HPYEN YEN SHAYI




Oh...Hpyen yen shayi ngai,
N kam hprawng la nngai,
N kam hprawng tim hprawng ra sai. 
Gun na rai hpe sumru yu,
Hta gun ra na zawn re chyu,
Tawn kau da na n rawng ai.
Yawng gun ngu yang n dang ai,
Myit kap rai hpe ngai hta gun,
Buri kata hta baw gun.
lata de gaw ama dun,
Aman de mung ama ba,
Hkrunla hkawn ai n hkring n sa.
Ruyak jamjau hkrum magang,
Karai hpe sha kam dingyang.
Buga hpe mung shakram da,
Laiza pa de rawt mat wa.
Li la raitim sharang ai,
Laiza pa de du bang sai.
Jinghku ni hte bai hkrum lu,
Kabu myi prwi pur ai lu.
Yup, Nga shara kaja hkra,
Ra n rawng hkra lajang ya.
Myit galu hte woi lakawn,
Hpa-awn ni hpe mung grai shakawn.

Oh...Hpyen yen shyi ngai,
Kaning n chye di mat ni ai.
Dum nta hpe wa kawan yu...
Myit n pyaw na lam ni pru.
Nta ting yawng tsing hkrai hkrai.
Kabye shara n  mu sai.
U, W, Yamnga tawn kau da,
Madu n re ni sat sha.
Mare ting mung shingran katsi,
Myit hta n pyaw kaning n di.
Daini ngwi pyaw simsa hkra,
Nang ngai yawng nan shakut ra.
Karai hpe shingdu dat n mai,
Tsadan hpyen hpe dang ra ai.
Anhte a awng padang
Yehowa Karai Kasang hpe
Hkying ten shagu tut e
shakawn ga lu oi....



Marip Hkawn San
Na Lung
(Simsa Kasa Journal V-1, I -1)

No comments:

Post a Comment