The Voice Weekly
Voice : Myanmar Peace Centre ကို ဘယ်လိုကနေ ဘယ်လို ရည်ရွယ်ချက်နဲ့ တည်ထောင်ဖြစ် သွားတာလဲ။ MPC ကို ဘယ်ခေါင်းစဉ်အောက်မှာ ထားရမလဲ။ NGO လား၊ အစိုးရ အဖွဲ့အစည်းလားဆိုတာ နည်းနည်းလောက် ရှင်းပြပေးပါ။
UTMT : MPC ဘာကြောင့်ဖွဲ့ရလဲ ဆိုရင် ကျွန်တော်တို့
ငြိမ်းချမ်းရေး လုပ်ငန်းစဉ် စပြီးအကောင်အထည်ဖော် ချိန်ကနေ စပြောရမှာ
ဖြစ်ပါတယ်။ သမ္မတကြီးရဲ့ ငြိမ်းချမ်းရေးဖိတ်ခေါ်မှု အရ တာဝန်ပေးခံရတဲ့
ဝန်ကြီးဦးအောင်မင်း က တိုင်းရင်းသားလက်နက်ကိုင် အဖွဲ့အစည်းတွေကို
တစ်ဖွဲ့ချင်းလိုက်တွေ့ ပြီး အကျိုးအကြောင်း ရှင်းပြခဲ့တယ်။ ငြိမ်းချမ်းရေး
စတင်ဆောင်ရွက်တဲ့အချိန် မှာက အောင်မြင်မှု၊ တိုးတက်မှု ဘယ်လောက်ရမယ်ဆိုတာ
မသိဘူး။ အဲဒီအချိန်မှာက ငြိမ်းချမ်းရေးအတွက် ကော်မတီ ဖွဲ့ထားတာကလွဲလို့
ဖွဲ့စည်းပုံ မရှိဘူး။ ထုတ်နုတ်အင်အားတွေနဲ့ပဲ အလုပ်လုပ်ခဲ့ရတာ။
ဒီလိုလိုက်တွေ့၊ ဆွေးနွေးလို့ရလာတဲ့ ရလဒ်တွေကို အခြေခံပြီး
ငြိမ်းချမ်းရေးလုပ်ငန်းစဉ် အတွက် ရုံးအဖွဲ့တစ်ဖွဲ့ စနစ်တကျဖွဲ့ စည်းဖို့
လိုအပ်တယ်ဆိုတာ သိလာတယ်။ ဒါကြောင့် MPC ကို ဖွဲ့စည်းဖို့ဆုံးဖြတ်ပြီး
ကြိုးစားခဲ့တာဖြစ်တယ်။ MPC ဟာ အဖွဲ့အစည်း သဘောတရားအရ ဆိုရင်တော့
အစိုးရတစ်စိတ်တစ်ပိုင်း အဖွဲ့အစည်း ဖြစ်တယ်။ မြန်မာနိုင်ငံငြိမ်းချမ်းရေး
တည်ဆောက်မှုဖြစ်စဉ်ရဲ့ လိုအပ်ချက် တွေနဲ့ စိန်ခေါ်မှုတွေကို အထိရောက်ဆုံး
စီမံဆောင်ရွက်နိုင်ဖို့ ဒီပုံစံမျိုးကို စဉ်းစား ခဲ့တာဖြစ်တယ်။မြန်မာနိုင်ငံရဲ့ငြိမ်းချမ်းရေး တည်ဆောက်မှုဖြစ်စဉ်မှာ သိမ်မွေ့နက်နဲ တာတွေရှိတယ်။ စိန်ခေါ်မှုတွေများတယ်။ တချို့ကိစ္စတွေက အစိုးရအနေနဲ့ အဖြေ ထုတ်မှရမှာဖြစ်သလို တချို့ကိစ္စတွေ ကျတော့လည်း အစိုးရမဟုတ်တဲ့ အဖွဲ့အစည်း အနေနဲ့ လုပ်ဆောင်ရမှာ ဖြစ်တာကြောင့် ဒီလို အစိုးရတစ်စိတ်တစ်ပိုင်း ပုံစံဖြစ်တဲ့ Semi-Government အဖွဲ့အစည်းပုံစံ ဖွဲ့စည်းခဲ့ရတာဖြစ်တယ်။ MPC ရဲ့ ရည်ရွယ်ချက် သုံးချက်ရှိတယ်။ ပထမ တစ်ချက်က ရုံးအဖွဲ့အနေနဲ့ ဆောင်ရွက် ပေးတယ် (Secretariat)။ ဒုတိယအချက် ကတော့ အပစ်အခတ်ရပ်စဲရေးနဲ့ နိုင်ငံရေးဆွေးနွေးမှုတွေ အတွက် လိုအပ်မယ့် Technical Support / Institutional Support ပေးဖို့နဲ့ တတိယအချက်ကတော့ တစ်တွဲတည်းပါလာမယ့် ငြိမ်းချမ်းရေး တည်ဆောက်မှုလုပ်ငန်းတွေမှာ ညှိနှိုင်း ဆောင်ရွက်မှုတွေ လုပ်ဆောင်ပေးဖို့ပဲ ဆိုတဲ့ ရည်ရွယ်ချက်သုံးခုနဲ့ ထူထောင် ထားတာဖြစ်တယ်။
Voice : MPC ရဲ့ ငွေကြေးသုံးစွဲမှု က ပွင့်လင်းမြင်သာမှုမရှိဘူးလို့ ဝေဖန်မှု တွေ ထွက်နေတဲ့အပေါ် ဘယ်လိုများ တုံ့ပြန်ချင်ပါသလဲ။
UTMT : MPC ရဲ့ ဘတ်ဂျက်လို့ ပြောရင် ငြိမ်းချမ်းရေးတည်ဆောက်ဖို့ အတွက် အလှူရှင်နိုင်ငံတွေက ကတိကဝတ် ပြုထားတဲ့ ဘတ်ဂျက်နဲ့ခွဲခြားပြီး ပြောရမယ်။ ကတိကဝတ်ပြုထားတဲ့ ငွေကြေးပမာဏကတော့ PDSG က တစ်ဖွဲ့ချင်း၊ တစ်နိုင်ငံချင်းက ကတိပြု ထားတဲ့ ငါးသန်းစီနဲ့ စုစုပေါင်းဒေါ်လာ သန်း ၃၀ ရှိပါတယ်။ အဲဒီဘတ်ဂျက် တွေက ငြိမ်းချမ်းရေးတည်ဆောက်မှု လုပ်ငန်းတွေမှာ အသုံးပြုမှာဖြစ်ပါတယ်။ လက်ရှိအနေအထားမှာ စမသုံးသေးပါဘူး။ စနစ်တကျသုံးစွဲနိုင်ဖို့ PDSG/MPSI အနေနဲ့ Pilot Projects (စမ်းသပ် စီမံကိန်များ) လုပ်နေတာရှိပြီး Joint Needs Assessment လို့ခေါ်တဲ့ လေ့လာမှု တွေလုပ်ပြီး သုံးစွဲသွားမှာပါ။ အဲဒီလိုပဲ တခြား NGO တွေ၊ အဖွဲ့အစည်းတွေ ကလည်း ငြိမ်းချမ်းရေးတည်ဆောက်မှု လုပ်ငန်းတွေမှာ ကူညီဆောင်ရွက်လို တယ်ဆိုရင် တိုင်းရင်းသားအဖွဲ့အစည်း တွေနဲ့ တိုက်ရိုက်ချိတ်ဆက်လုပ်ကိုင် ခွင့်ပြုသွားမှာ ဖြစ်ပါတယ်။ ဒီဟာတွေ ကတော့ ငြိမ်းချမ်းရေးတည်ဆောက်မှု လုပ်ငန်းအတွက် အကူအညီတွေကို ထိထိရောက်ရောက် သုံးစွဲလုပ်ကိုင်နိုင်ဖို့ ပြင်ဆင်ထားမှုပဲဖြစ်ပါတယ်။ MPC ရဲ့ ဘတ်ဂျက်ကတော့ ငြိမ်းချမ်းရေး တည်ဆောက်မှု လုပ်ငန်းတွေရဲ့ ဘတ်ဂျက်နဲ့ အသွင်သဏ္ဌာန် ကွဲပြားပါတယ်။ MPC ကို အဓိက ဘတ်ဂျက်ထောက်ပံ့တဲ့ အဖွဲ့အစည်းက EU ဖြစ်ပြီး MPC ရဲ့ လုပ်ငန်းတွေဖြစ်တဲ့ ရုံးအဖွဲ့လုပ်ငန်းတွေ၊ အစည်းအဝေးတွေ ကျင်းပတာ၊ ခရီး သွားတာစတဲ့ အုပ်ချုပ်မှုဆိုင်ရာကိစ္စတွေ လုပ်ဖို့ ဖြစ်သလို ပညာရှင်တွေဦးဆောင် လုပ်ကြမယ့် Technical Support အတွက် လည်း သုံးစွဲသွားမှာဖြစ်ပါတယ်။ ဒါတွေ ကတော့ မှတ်တမ်းတင်တာ၊ သုတေသန ပြုတာနဲ့ ဆွေးနွေးပွဲတွေအတွက် လိုအပ် တဲ့စာတမ်းတွေ ပြုစုပေးတာတွေကို အစိုးရရဲ့ ငြိမ်းချမ်းရေးကော်မတီ အတွက်ရော တိုင်းရင်းသားအဖွဲ့အစည်းတွေ အတွက်ပါ လုပ်သွားရမှာပါ။
MPC ပညာရှင်အဖွဲ့က လုပ်နေတဲ့ လုပ်ငန်းတွေ က Technical Support လုပ်ငန်းတွေ ဖြစ်တဲ့အတွက် ဘက်လိုက်ဖို့မလိုအပ်ဘဲ သမာသမတ်ရှိဖို့သာ လိုပါတယ်။ အဓိက ကျတဲ့အချက်ကတော့ ငြိမ်းချမ်းရေး တည်ဆောက်မှု လုပ်ငန်းတွေမှာ အသုံးပြု မယ့် ဘတ်ဂျက်ကို MPC က ကိုင်တွယ် အသုံးပြုသွားမှာ မဟုတ်ဘဲ သက်ဆိုင်ရာ အဖွဲ့အစည်းတွေက လက်ခံရယူမယ့် တိုင်းရင်းသားလက်နက်ကိုင် တွေနဲ့ တိုက်ရိုက်ချိတ်ဆက် ဆောင်ရွက်သွားမယ် ဆိုတာ ရှင်းရှင်းလင်းလင်း သိစေလိုတာပဲ ဖြစ်ပါတယ်။
Voice : ငြိမ်းချမ်းရေးလုပ်ငန်းစဉ်အပေါ်မှာ အစိုးရက ဘတ်ဂျက်စိုက် ထုတ်သုံးစွဲမှုမရှိဘူးလို့ ဆိုတာကကော အမှန်ပဲလား။
UTMT : မှန်ပါတယ်။ ဒါပေမဲ့ အစ ကနဦးမှာ အစိုးရဘတ်ဂျက်အနေနဲ့ စိုက်ထုတ်သုံးစွဲမှု မရှိဘူးဆိုပေမယ့် MPC အတွက် အသုံးပြုမယ့် အဆောက်အအုံ တွေကတော့ အစိုးရက In Kind အနေနဲ့ ထောက်ပံ့ပေးထားတာဖြစ်ပါတယ်။ အခုလာမယ့် ဘတ်ဂျက်မှာ ငြိမ်းချမ်းရေး တည်ဆောက်ရေး လုပ်ငန်းများနဲ့ MPC လုပ်ငန်းတွေအတွက် အစိုးရဘတ်ဂျက်တွေ ရမှာဖြစ်ပါတယ်။ တင်တဲ့ပမာဏ ကိုတော့သိပါတယ်။ လွှတ်တော်က ဘယ်လောက်ဖြတ်မယ်ဆိုတာ မသိသေးလို့ အတိအကျတော့ ပြောလို့မရသေးပါဘူး။
Voice : အစစအရာရာ အခုမှ ပြန် တည်ဆောက်နေတဲ့အချိန် သိပ်ဆင်းရဲ နေတဲ့ လူတွေအများကြီးရှိနေတဲ့ နိုင်ငံမှာ ပညာရှင်တွေရဲ့ လစာတွေက သိပ်များ တယ်လို့ ဝေဖန်မှုတွေလည်း ရှိပါတယ်။ အဲဒီအပေါ်မှာရော ဘယ်လိုတုံ့ပြန်ချင် ပါသလဲ။
UTMT : MPC ထူထောင်ရာမှာ ပြည်ပရောက် မြန်မာနိုင်ငံသား ပညာရှင်တွေရဲ့ လုပ်အားကို ရယူဖို့ လိုအပ်ခဲ့ပါတယ်။ ဒီလိုအပ်ချက်အရ EU ရဲ့ ဘတ်ဂျက် အထောက်အပံ့နဲ့ ပညာရှင်တွေကို ခန့်ထား တာဝန်ထမ်းဆောင်စေခဲ့ပါတယ်။ တစ်ဦး ချင်းစီရဲ့ လခတွေအနေနဲ့ နိုင်ငံတကာ အဖွဲ့အစည်းတွေမှာ ကျင့်သုံးတဲ့ လုပ်နည်း လုပ်ထုံးတွေ အရ MPC အနေနဲ့ ထုတ်ဖော် ပြောဆိုခွင့် မရှိပါဘူး။ ဒါပေမဲ့ ကာယကံရှင် ကိုယ်တိုင် သူ့သဘောနဲ့သူ ပြောရင်လည်း ပြောလို့ရပါတယ်။ အခုလို Executive Recruitment ကို EU က တာဝန်ပေးတဲ့ အဖွဲ့တစ်ဖွဲ့က လုပ်ခဲ့တာပါ။ ပညာရှင် တစ်ဦးချင်းစီနဲ့ အဲ့ဒီအဖွဲ့ ညှိနှိုင်း သဘောတူညီခဲ့တဲ့ အတိုင်း လခတွေပေးထားတာ ဖြစ်တယ်ဆိုတာကို ပြောချင်ပါတယ်။ လစာအနည်းအများ ကတော့ ပညာအရည်အချင်း လုပ်ငန်းအတွေ့အကြုံ ပေါ်မှာ မူတည်ပြီး ကွာခြားမှုရှိတယ် ဆိုတာ သိရပါတယ်။ MPC မှာ ကျွန်တော်တို့ အနေနဲ့ နိုင်ငံတကာဝန်ထမ်း၊ ပြည်တွင်း ဝန်ထမ်းလို့ ခွဲခြားမှုမရှိဘဲ ဝန်ထမ်းအားလုံး ကိုယ့်အရည်အချင်း အလိုက် လစာတွေ ရရှိဖို့ မူချပြီး လုပ်ကိုင်နေပါတယ်။
Voice : ငွေကြေးသုံးစွဲမှုနဲ့ ပတ်သက်လို့ မီဒီယာတွေမှာ ဖော်ပြနေတာ တွေကိုရော ဘယ်လိုများ ပြောချင်ပါသလဲ။
UTMT : အခုတစ်လော မီဒီယာတွေ မှာ ပါနေတဲ့ ကိန်းဂဏန်းတွေက လွဲနေပါတယ်။ နီပွန်ဖောင်ဒေးရှင်းက ဒီနှစ်အတွက် လျာထားတဲ့ ဘတ်ဂျက်က ဒေါ်လာသုံးသန်းပါ။ သန်း ၃၀၀ မဟုတ်ပါဘူး။ ဒီကိစ္စမှာလည်း MPC အနေနဲ့ ညှိနှိုင်းပေးတာ သက်သက်ကိုပဲလုပ်တာ။ နီပွန်ဖောင်ဒေးရှင်းက တိုင်းရင်းသား အဖွဲ့အစည်းတွေနဲ့ တိုက်ရိုက်ချိတ်ဆက်ပြီး လုပ်တာပါ။ နောက်ဆုံး ကျွန်တော့်အနေနဲ့ ဖြည့်စွက် ပြောချင်တာကတော့ MPC ရဲ့ ဘတ်ဂျက်ကို EU အပါအဝင် နိုင်ငံတကာက လက်ခံကျင့်သုံးတဲ့ ငွေကြေးသုံးစွဲခြင်း ဆိုင်ရာ စည်းမျဉ်းစည်းကမ်းနဲ့အညီ သုံးစွဲနေတယ် ဆိုတာရယ်၊ အလွဲသုံးမှု လုံးဝမရှိဘူး ဆိုတာရယ်ပါ။ ဒီလိုပဲ EU ကို ရှင်းလင်းရတဲ့ နည်းတူ တစ်ဖက်မှာလည်း ကိုယ့်နိုင်ငံ အစိုးရကိုလည်း လုပ်ထုံး လုပ်နည်းတွေနဲ့ အညီ ရှင်းလင်းတာဝန်ခံ လုပ်ကိုင်လျက်နေတယ် ဆိုတာ ပြောချင်ပါတယ်။
No comments:
Post a Comment