December 28, 2013

ယခုနှစ်အတွင်း ကျင်းပခဲ့သည့် ၈၈ လူထုလှုပ်ရှားမှုကြီး ၂၅ နှစ်ပြည့် အမှတ်တရအစီအစဉ် & တရုပ်အရေးအခင်းနှင့်နှိုင်းယှဉ်ချက်

ရှစ်လေးလုံးလူထုလှုပ်ရှားမှု ၂၅ နှစ်ပြည့် (Min Ko Naing) (2013 in Review)

ရှစ်လေးလုံးလူထုလှုပ်ရှားမှု ၂၅ နှစ်ပြည့် 
မင်းကိုနိုင် ။ ဒီဇင်ဘာ ၊ ၂၀၁၃

(ယခုနှစ်အတွင်း ကျင်းပခဲ့သည့် ၈၈ လူထုလှုပ်ရှားမှုကြီး ၂၅ နှစ်ပြည့် အမှတ်တရအစီအစဉ်ကို “ငွေရတု”ဟူသောစကားလုံးသုံးစွဲမှုနှင့် ပတ်သက်ပြီး အငြင်းပွားဖွယ်ဖြစ်ခဲ့သည်။
အစိုးရဝန်ကြီးတချို့လည်း ဖိတ်ကြားချက်အရ ထိုအစီအစဉ်သို့ တက်ရောက်လာခြင်းသည်လည်း အငြင်းပွားဖွယ်ဖြစ်ခဲ့သည်။ ထိုအကြောင်းအရာများနှင့်ပတ်သက်ပြီး မိုးမခမီဒီယာက ၈၈ မျိုးဆက်ခေါင်းဆောင် ဦးမင်းကိုနိုင်နှင့် တွေ့ဆုံမေးမြန်းရာ သူက လိုတိုရှင်း ဖြေကြားခဲ့ပြီး ၈၈ စိတ်ဓာတ် ရှင်သန်မှုအကြောင်းကိုလည်း ပြောပြခဲ့သည်။ အပေါ်ပုံမှာ ရန်ကုန်မြို့ရှိ  ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်းရုံးအတွင်း ရိုက်ကူးထားသောပုံဖြစ်သည်)

၁၉၈၈ အရေးတော်ပုံကို ပြည်သူလူထုရဲ့ တကယ့် အရေးပါတဲ့ အောင်ပွဲ၊ ပြည်သူလူထုရေးတဲ့သမိုင်းလို့ ကျနော်တို့က သဘောထားတယ်။
ဒါက ဘုရင်ကိုသတ်တဲ့သူက ဘုရင်ဖြစ်တဲ့ကိစ္စမဟုတ်ဘူး။ ကမ္ဘာ့စံချိန်တင်လောက်အောင် သမ္မတ သုံးဆက်ကို ပြည်သူက ရက်ပိုင်းအတွင်း ဖြုတ်ချနိုင်တယ်ဆိုတာ အဲဒါက အောင်ပွဲမဟုတ်လို့ ဘာပွဲဖြစ်ရမှာလဲ။
ကျနော်တို့လိုချင်တဲ့ပန်းတိုင်ကို ချက်ချင်းမရောက်တာက ဒုတိယအပိုင်းလေ။ ဒါကြောင့် ကျနော်တို့က ငွေရတု ဆိုတဲ့ စကားလုံးကို ကျကျနနကို စဉ်းစားပြီးတော့ တလေးတနက်ကို သုံးလိုက်တာပါ။
ဝန်ကြီးဦးအောင်မင်းကို ဖိတ်လို့၊ သူတို့ အခမ်းအနားတက်လို့ သူတို့တောင်မှ အရေးတော်ပုံကြီးကို တကယ် အသိအမှတ်ပြုတဲ့စကားမျိုး ပြောရပြီလေ။ ကျနော်က အဲဒီလက္ခဏာဘက်ကပဲ ကြည့်တယ်၊
ရှစ်လေးလုံးအတွက် ပြတိုက် ကျနော်တို့တိုင်းပြည်မှာ ရှိသင့်တယ်၊ နိုင်ငံတော်ကနေပြီးတော့ တလေးတစားနဲ့ တမြတ်တနိုးလုပ်တဲ့ပြတိုက်မျိုး ဖြစ်သင့်တယ်။ တချိန်ချိန်မှာ ကိုယ်စားပြုနေတဲ့ အစိုးရတရပ်ရပ်က အသိအမှတ်ပြုတယ် ဆိုရင် နောက်အစိုးရတွေလည်း ဆက်ပြီး အသိအမှတ်ပြုမယ်၊ ဆိုလိုတာက အစိုးရကမတည်မြဲဘူးဗျာ၊ ကျနော်ပြောချင်တာက နိုင်ငံတော်၊ နိုင်ငံတော်ကနေပြီး ဂုဏ်ပြုရတဲ့ အထိမ်းအမှတ် တခုလည်း ဖြစ်ရမယ်၊ ပြတိုက်လည်း ဖြစ်ရမယ်၊
အဲဒီအတွက်ဆိုရင် ရှစ်လေးလုံးဟာ တကယ့် တိုင်းပြည်အတွက် အရေးပါတဲ့ အပြောင်းအလဲ၊ နောက်ပြီးတော့ ပြည်သူလူထုကြီး ချိုးခဲ့တဲ့ အချိုးအကွေ့ ဆိုတာ သူတို့ အသိအမှတ်ပြုတာ၊ ကျနော်တို့လိုချင် အသိအမှတ်ပြုမှုကိုပဲ။
၈၈ စိတ်ဓာတ်က ရိုးရိုးလေးပါ၊ ဖိနှိပ်ချုပ်ခြယ်တာရယ်၊ အခွင့်ထူးခံတာရယ် – အဲဒီနှစ်ခုကို ကိုယ်နဲ့မဆိုင်ဘူးဆိုပြီးတော့ တွန်းလှန်ကြတာပေါ့။ တွန်းလှန်ကြတဲ့နေရာမှာ ကျနော်တို့က ထပ်ပြီးတော့ ပိုပြီးတော့ ပြင်းထန်တဲ့ ခြိမ်းခြောက်မှုတွေနဲ့ ကြုံရတယ်၊ အဲဒါတွေကို ထပ်ကျော်လွှားပြီးတော့ ရင်ဆိုင်ကြတယ် ဆိုတော့ အဲဒီစိတ်ဓာတ်မျိုးဟာ ယာယီလက္ခဏာအရ ငုတ်လျှိုးရတဲ့ကာလတွေ ရှိကောင်းရှိပါလိမ့်မယ်၊ ဒါပေမယ့် ဆက်ပြီး သယ်ဆောင်နိုင်တာ သေချာတယ်ဗျ။
ဒီနေ့အထိ လူတွေရဲ့ နိုးကြားမှု တက်လာတာတွေကိုကြည့်၊ အဲဒါတွေက ပြောရမယ်ဆိုရင် ကာလတခုပဲ အာဏာ ကြမ်းကြမ်း သုံးပြီးတော့ တားဆီးထားလို့ ရမယ်၊ ထာဝရတော့ ဘယ်လိုမှ မရဘူး၊ နောက်ဆုံးတော့ လူတွေအားလုံး နားလည်တာက ၈၈ ဆိုတာ ဓမ္မ နဲ့ အဓမ္မ အားပြိုင်တာပဲ။ အဲဒီအားပြိုင်မှုက နောက်ဆုံးမှာ ဓမ္မက အနိုင်ရစမြဲပဲ၊ ဘာဖြစ်လို့လဲ ဆိုတော့ ဒါ နိယာမကြီးဖြစ်နေလို့။ တခုပဲ ရှိတယ်၊ ဒါက ကြာတတ်တယ်၊ အင်အား မပြည့်စုံသေးသရွေ့ ကြာတတ်တယ်၊ အဲဒါကို ကျနော်တို့လူထု နားလည်ပါတယ်။
အခုက နောက်မျိုးဆက်တွေက ကျနော်တို့ပေးနိုင်တာက – ၈၈ ဆိုတာ  ပြည်သူလူထုလှုပ်ရှားမှုဖြစ်တယ်၊ ဒါကြောင့်မို့ တစုတဖွဲ့ကောင်းနဲ့ လုပ်လို့ မရဘူး၊
တမျိုးသားလုံး ဟန်ချက်ညီညီလုပ်နိုင်မှ အပြောင်းအလဲတခု ဆိုတာ  ဖြစ်လာမယ် ဆိုတဲ့အနှစ်ကိုတော့ ကျနော်တို့ ပေးနိုင်ရလိမ့်မယ်၊ ကျနော်တို့မှာလည်း တာဝန်ရှိတယ်၊ နောက်မျိုးဆက်တွေမှာလည်း ခံယူဖို့ တာဝန်ရှိပါတယ်။
==========================================
၂၀၁၃ နဲ့ ပုဂ္ဂိုလ်တချို့၊ ဖြစ်ရပ်တချို့
နှစ်ကုန်ချိန်မှာ ၂ဝ၁၃ အတွင်း အရေးကြီးဖြစ်ရပ်၊ အထင်ကရဖြစ်ခဲ့သူ၊ မေ့လျော့ခံနေရသူတွေထဲက တချို့အကြောင်း ပြောပြဖို့ မိုးမခမီဒီယာက ရွေးချယ်ထားပါတယ်။
တနှစ်တာအတွင်း လှုပ်ရှားဖြတ်သန်းခဲ့တာတွေကို သုံးသပ်ခြင်း၊ ပြန်လည်သတိရခြင်း၊ မိတ်ဆက်ပေးခြင်းတွေ ပါဝင်မှာဖြစ်ပါတယ်။
- See more at: http://moemaka.com/archives/34685#comment-16028


Comment (Ngunjawa 2)
ရှစ်လေးလုံးပုံစံ တရုပ်ပြည် Tiananmen Square protests of 15 April 1989 – 4 June 1989
 တရုပ်ပြည်ကို အနောက်နိုင်ငံပုံစံ ပြုပြင်ပြောင်းလဲလိုတဲ့ ခေါင်းဆောင် Hu Yaoband နေရာ၊ ကျောက်ဇီယန် Zhao Ziyang နဲ့ အစားထိုးပြီးခဲ့ပါတယ်။ သိပ်မကြာခင်မှာ Hu Yaoband ကွယ်လွန်သွားပြီး ဈာပနကို အကြောင်းပြု ၁၉၈၉မှာ တရုပ်ပြည် မြို့ကြီးပေါင်း ၄၀၀ကျော်မှာ မြန်မာပြည် ရှစ်လေးလုံးလိုပဲ တရုပ်တနိုင်ငံလုံးဆန္ဒပြကြပါတယ်။ တရုပ်အစိုးရ ပြုပြင်ပြောင်းလဲမှုကြောင့် ၂နှစ်အကြာမှာ ကုန်ဈေးနှုန်း ၃၀% တက်လာပြီး၊ လခစား ဝန်ထမ်းတွေ လစာနဲ့မလောက်ခြင်း၊ ပြုပြင်ပြောင်းလဲမှုမှာ အစိုးရထိပ်ပိုင်းလူများ လာဘ်စားမှုနဲ့ ဆွေမျိုးများစီးပွားလုပ်မှု corruption and nepotism အရမ်းကြီးမားလာတဲ့အတွက် ဖြစ်ပါတယ်။

 တရုပ်ပြည် သိပ္ပံနည်းပညာတက္ကသိုလ် ပါမောက္ခ Fang Lizhi ဦးဆောင်တဲ့ ကျောင်းသား၊ဆရာအုပ်စုများ နဲ့ တတိုင်းပြည်လုံး အုံကြွမှုကြောင့် ဆန္ဒပြသူ သန်နဲ့ချီပြီး ပီကင်းမြို့က Tiananmen Square ကို တရုပ်ဝန်ကြီးချုပ် ကျောက်ဇီယံ စာနာမှုပြခဲ့ပါတယ်။ တိန်ရှောင်ဖိန့် ဦးစီးတဲ့ တရုပ်အစိုးရ က ကျောက်ဇီယန်ကို ဖယ်ရှားပြီး၊ စစ်တပ်နဲ့နှိမ်နင်းဖို့လုပ်ပါတယ်။ လက်မခံတဲ့ စစ်ဗိုလ်ချုပ်ကြီး ၇ဦးကိုလည်း ဖယ်ရှားလိုက်ပါတယ်။ လူအသေပျောက်နည်းပါးစွာနဲ့ စစ်အုပ်ချုပ်ရေးကြေညာပြီး အနောက်နိုင်ငံစတိုင် ပါတီစုံဒီမိုကရေစီတောင်းဆိုမှု နှိမ်နင်းလိုက်ပါတယ်။

 ကျောက်ဇီယံလည်း ၁၅နှစ်ကြာ အကျယ်ချုပ်ခံရပြီး၊ ၂၀၀၅မှာ ကွယ်လွန်ပါတယ်။ သူ့မှတ်တမ်းတိတ်ခွေကို စာအုပ်ထုတ်ပြီး The Secret Journal of Premier Zhao Ziyang. 306-page ဟောင်ကောင်မှာ တရုပ်၊ အင်္ဂလိပ်ဘာသာများနဲ့ ဖြန့်ဝေခဲ့ပါတယ်။ တရုပ်ပြည်မမှာတော့ စာအုပ်ထုတ်ဝေခွင့်မရပေမဲ့၊ အွန်လိုင်းဒေါင်းလုပ် ဖတ်နိုင်ပါတယ်။ ပါမောက္ခ Fang Lizhi လည်း အမေရိကန်သံရုံးမှာ ပြေးဝင်ပြီး ခိုလှုံခွင့်တောင်းတာ တစ်နှစ်အကြာ တရုပ်ပြည်ကထွက်ခွာခွင့်ရပြီး၊ အနောက်နိုင်ငံတက္ကသိုလ်များမှာ ပါမောက္ခအလုပ်နဲ့ Activist လုပ်ဆောင်ရင်း အမေရိကန်မှာနေထိုင်ပါတယ်။ ၂၀၁၂ ကွယ်လွန်ပါတယ်။ ကျောင်းသားခေါင်းဆောင်၊ တတ်သိပညာရှင်များစွာလည်း ထိမ်းသိမ်းခံရခဲ့ပါတယ်။ အမေရိကန်အစိုးရက စီးပွားရေးပိတ်မဲ့အရေးတွေကြောင့် ပြန်လွှတ်ခဲ့ပါတယ်။ အများစုဟာ အခုချိန်ထိ အနောက်နိုင်ငံတွေမှာပဲ ရှိနေပါသေးတယ်။ ပြန်လာခွင့်ရှောက်သူများကိုလည်း လစ်လျူထားဆဲ ဖြစ်ပါတယ်။ ၂၀၁၀ မှာ နိုဘယ်ဆုရတဲ့ Liu Xiaobo ကိုလည်း ပြည်ပထွက်ခွင့်မပေးပါဘူး။ အခုလည်း တရုပ်ပြည်ပါတီစုံ ဒီမိုကရေစီအားပေးတဲ့ တက္ကသိုလ်ပါမေက္ခများကို အလုပ်ကထုတ်ပယ်နေကြဆဲ ဖြစ်ပါတယ်။ ကွန်မြူနစ်တစ်ပါတီပဲ ဒီမိုကရေစီဆက်လုပ်မဲ့ သဘောပါ။

 မြန်မာပြည် ၁၉၈၈ အပြီးမှာ တရုပ်ပြည် ၁၉၈၉ အရေးခင်းဖြစ်ပါတယ်။ တရုပ်အရေးခင်း ခေါင်းဆောင်များဟာ တရုပ်အစိုးရအဖွဲ့ထဲပါဝင်ခွင့်မရပေမဲ့ သူတို့ကြောင့် တရုပ်ပြည်က corruption and nepotism လျော့နည်းသွားခြင်းဖြစ်ပါတယ်။ ယခု ၂၀၁၃ မြန်မာပြည်က ရှစ်လေးလုံးခေါင်းဆောင်အချို့ကတော့ လွှတ်တော်မှာရောက်နေပြီး၊ တရုပ်ပြည်ထက် အခြေအနေ ပိုကောင်းလာပါစေ၊ လာဘ်စားမှုနဲ့ဆွေမျိုးများစီးပွားရေးကြီးစိုးမှု corruption and nepotism ကို ဘယ်လိုကျော်လွှားနိုင်မယ်ဆိုတာ စောင့်မျှော်နေပါတယ်။ 

No comments:

Post a Comment